اليوم أول يوم نولد بيه الطفل، ورجعتوا للبيت بالسلامة 🙏
نبدي بأول صباح خطوة بخطوة...
من أول يوم دكتور
اي و الله من اول يوم
يلا نرتب :
🌞 الصبح للضوء والضوضاء مو للنوم
💖 افتحي الستائر، دخلي الضوء للبيت بأسرع وقت.
كلما صبح أبكر، كلما أحسن!
احجوا، سولفوا، تحركوا، لا تسكتون كأنما أكو طفل نايم.
الصبح ما نخلق للنوم، الصبح للضوء والضوضاء 🌤️
💖 غيري ملابس الطفل من ملابس النوم إلى ملابس مرتبة.
يمكن تسألين: "دكتور قابل راح يروح للدوام؟"
أكولج بعد كم سنة إيه 😄 بس من هسه علميه الترتيب من الصبح.
🍼 أول رضعة صباحية
💖 خليه جلد على جلد وياج حتى لو ترضعيه صناعي.
وطبعًا يا ريت تكون الرضاعة طبيعية ❤️
خليه بقربك، حتى لو تشيلينه وتتحركين بالبيت.
💖 ركزي على الرضاعة الصباحية، لأن الأكل كله تركيزه الصبح.
💖 من يغفى، لا توقفين الرضاعة، كمّلي واحجي وياه، غنّيله، واحجيله قصص 🎶
💖 بعد كل رضعة، تربيت خفيف على الظهر حتى يطلع الهواء ويتعلم يرفع راسه.
👶 المغص والغازات أول الأيام
💖 طبيعي جدًا أول أسبوع يصير عند الطفل مغص أو انتفاخ بسيط،
خصوصًا لأن جهازه الهضمي بعده يتعلم يشتغل
لهذا السبب قطرات كوليف تساعد على هضم الحليب وتقلل الغازات والمغص، وهي آمنة من اليوم الأول، سواء كان حليب طبيعي أو صناعي.
💖 تذكّري، الراحة بالنهار والليل تعتمد على بطن مرتاح 😌
🚼 بعد الرضعة
💖 بعد كل رضعة، لا تنسين تربتين على ظهره.
وبعدها وقت الخروج — ارفعي رجليه شوي، وسوي حركة البايسكل.
راح تلاحظين راحة أكثر ونوم أهدأ بعدين.
🎶 وقت اللعب والنهار
💖 العبي ويه الطفل، غنّيله، اقريله قصة.
إي نعم، حتى لو عمره يوم واحد!
تذكّري دائمًا: النهار للضوء والضوضاء.
😴 وقت القيلولة
💖 من يتثاوب أو يرمش ببطء، خليه بفراشه المخصص للنوم —
مو كرسي السيارة أو أي مكان آخر.
خليه يتعلم أن فراشه = للنوم.
💖 خليه ينام والضوء مفتوح والضوضاء موجودة (غسالة، موسيقى خفيفة).
لا تخلين القيلولة تطول أكثر من ساعتين.
ساعه ونص إلى ساعتين كافي جدًا.
🌙 اجا الليل؟ هسه نبدل الطقوس
💖 تأكدي أنه صاحي أقل شي ساعتين قبل وقت النوم.
حددي وقت نوم ثابت — ٨ أو ٩ ليلاً، اللي يناسبك، بس أهم شي ينام مبكر.
💖 طفي الأضوية، تذكّري: الضوء الأبيض ضد النوم.
غلقي الستائر، وخلي ضوء خافت جدًا، وبلا صوت ولا همس.
💖 لبسيه بجامة مريحة وواسعة، وجو الغرفة معتدل (أقل من ٢٤ درجة).
🌜 روتين النوم
💖 خليه ينعس بالحضن بهز خفيف أو قبلة على الراس، وبعدين ضعيه بفراشه نعسان مو نايم حتى يتعلم ينام وحده.
💖 إذا بجى بعدين، رضعيه أو ربّتي على ظهره بهدوء.
ولا تكعديه إذا نام، إلا بالأسبوعين الأوائل إذا نام أكثر من ٤ ساعات.
🌑 رضاعة الليل
💖 لا تفتحين الضوء.
💖 لا تحجين وياه ولا تناغينه.
💖 بس غيري الحفاظ إذا بيه خروج أو طفح.
💖 بعد الرضاعة، ربّتي على ظهره تربيت خفيف يشبه المساج حتى ينام أكثر.
💖 الجلد على الجلد فقط بالنهار، مو بالليل.
🧸 الملخص:
طقوس النهار = ضوء + حركة + ضوضاء
طقوس الليل = ظلمة + هدوء + روتين ثابت
وهذا ملخص خبرتي كـ طبيب أطفال وكأب 👨⚕️
عشرات الأمهات والآباء متبعين هذا النظام وطفلهم منظم مثل الكتاب
